26 февраль, 2023

Туркияда зилзиладан кейин 612 кишига нисбатан текширув бошланди

Туркияда кетма-кет зилзилалар пайтида биноларнинг қулашига алоқадор бўлган 612 кишига нисбатан тергов ишлари бошланди, дея хабар бермоқда Associated Press Туркия ҳукуматига таяниб. Мамлакат Адлия вазири Бекир Бўздағ, 184 нафар гумондорнинг суд қароригача қамоққа олинганини маълум қилди. Улар орасида қурилиш пудратчилари, биноларнинг эгалари ёки бошқарувчилари бор эди. Вайрон бўлган биноларнинг аксарияти сифатсиз материаллар ва усуллардан фойдаланган ҳолда қурилган, уларнинг баъзилари давлат стандартларига жавоб бермаган. Туркия тарихидаги қарийб 100 йил ичидаги энг катта 7,7 магнитудали зилзила 6 февраль куни юз берди. Сўнгги маълумотларга кўра, зилзилалар оқибатида 44,2 мингдан ортиқ киши ҳалок бўлган. АFAD маълумотларига кўра, зилзилалардан кейин Қаҳраманмараш марказида 9136 та ер силкиниши содир бўлган, 528 мингдан ортиқ одам минтақадан эвакуация қилинган. Воқеа содир бўлган ҳудудда қидирув-қутқарув ходимлари иш олиб бормоқда.