Тошкент вилоятида янги тарих музейи ташкил этилди
Ушбу музей биноси 1962 йилда қурилган бўлиб, дастлаб тикув цехи, почта алоқа бўлими бўлган. 1971 йилда эса қишлоқ таянч пункти ташкил этилган. Шундан сўнг, 1973 йил 3 октябрь куни ушбу таянч пунктига собиқ СССР Ички ишлар вазири, генерал-полковник Н.А.Шолоков ташрифида кичик лейтенант Носиров Сабриддин Гаппарович билан суҳбатлашиб, капитан унвонини берган.
Таянч пункти иш бошлагач, 11 та хорижий давлатлардан, яъни Германия, Россия, Въетнам, Ҳиндистон, Япония ва қатор чет давлатлардан Олий мартабали меҳмонлар, 14 та Республика Ички ишлар вазирлиги раҳбарлари шу ерга келиб, пункт фаолияти билан танишган.
Ўша пайтларда туманда 3 та профилактика инспектори фаолият юритиб, капитан С.Носировга хизмат оти бириктирилган. У 17 та қишлоқ, 5 та умумтаълим мактаби ва у ерда таълим олувчи 3,5 мингга яқин ўқувчиларга масъул эди. Сабриддин ота ўз даврида қишлоқ совети раиси, Совет иттифоқи қаҳрамони Хван Ман Гым билан ҳамкорликда иш фаолиятини ҳавас қиларли даражада олиб борган.
Қишлоқ таянч пункти тарих музейига кирар экансиз, ўша даврнинг фотожамланмалари, техник ускуналар, махсус кийимлар ҳамда видеолавҳаларнинг гувоҳи бўлиш мумкин.