25 февраль, 2023

Туркияга қутқарув ишлари учун кетган ўзбекистонлик ФВВ ходимлари қайтиб келди

Туркияда 18 кунлик қидирув-қутқарув ишларидан сўнг Ўзбекистон Фавқулодда вазиятлар вазирлиги отряди Тошкентга қайтиб келди. Маълум қилинишича, 6 февраль куни Туркиянинг жанубий-шарқий вилоятларида даҳшатли зилзила сабаб ўн минглаб инсонлар ҳалок бўлди. Ўзбекистон Президенти топшириғига кўра, Фавқулодда вазиятлар вазирлигининг 100 кишидан иборат қидирув-қутқарув гуруҳи табиий офат ўчоғи, яъни Ҳатай вилоятига жўнатилди. "Отрядимиз иштирокидаги қутқарув операцияси 2 ҳафтадан кўпроқ давом этди ва шу вақт ичида йигитлар вайроналар остидан 18 нафар тирик одам ва 200 га яқин жасадларни олиб чиқдилар. Бугун бизнинг қаҳрамонларимиз уйга қайтишди", - дейилади хабарда. Тошкент халқаро аэропортида Ўзбекистон Фавқулодда вазиятлар вазирлиги ходимларини оммавий ахборот воситалари, жамоатчилик вакиллари, Фавқулодда вазиятлар вазири ва бошқа расмий шахслар кутиб олди.