17 февраль, 2023

Ўзбекистонда дам олиш кунлари ёғингарчилик кутилмайди

Ўзгидромет хизмати агентлиги дам олиш кунлари — 18−19 февраль саналарида кузатиладиган об-ҳаво ҳақида маълумот берди. Ўтган ҳафта ёмғирли бўлди. Қорақалпоғистон ва Хоразм вилоятидан ташқари, охирги 2 кун ичида деярли ҳамма жойда вақти-вақти билан энг жадал ёмғирлар ёғди. Тоғолди ва тоғли ҳудудларда ёмғир ва қор кўринишидаги ёғингарчилик кучли бўлади. Ҳудуднинг катта қисмида бугун кундуз куни ёмғир ёғиши давом этади. Қорақалпоғистон ва Хоразм вилоятида бироз ёғингарчилик фақат айрим жойларда бўлиши мумкин. Бухоро ва Навоий вилоятларида кучсиз ёмғир фақат эрталаб ёғади. Ҳаво ҳарорати 5-10о илиқ, шимолда 0-5о илиқ атрофида бўлади. Шанба куни республика ҳудудининг катта қисмида ёғингарчилик тўхтайди, фақат республика жануби-шарқий ҳудудларининг баъзи жойларида бироз ёмғир ёғади. Якшанба куни Ўзбекистоннинг барча ҳудудларида ёғингарчиликсиз об-ҳаво бўлиши кутилмоқда. Республика бўйича баъзи жойларга туман тушиши кузатилади. Ҳаво ҳарорати кечаси 0-5о илиқ атрофида, баъзи жойларда 2о совуқгача бўлади, кундуз куни эса ҳаво 7-12о илиқгача исийди. Бугун пойтахтимизда вақти-вақти билан ёмғир ёғади, дам олиш куни ёғингарчилик кутилмайди. Кечаси ва эрталаб туман тушиши мумкин. Ҳарорат кечаси 0-3о илиқ, кундузи шанба куни 8-10о илиқ, якшанба куни 10-12о илиқ бўлади. Республиканинг тоғолди ва тоғли ҳудудларида 17-18 февраль кунлари сел-сув тошқин ҳодисалари юзага келиши мумкин. "Тоғли ҳудудларда дам олиш кунлари қор кўчиши хавфи сақланиб туради. Қор беқарор ҳолатда бўлади, тоғларга борганингизда жуда эҳтиёт бўлинг", - дейилади хабарда.