16 февраль, 2023

Филиппинда 6 балли зилзила юз берди

Филиппинда 6,0 магнитудали зилзила содир бўлди. Бу ҳақда Филиппин вулқонология ва сейсмология институти маълум қилди. Зилзила маҳаллий вақт билан 02:10 да қайд этилган бўлиб, эпицентри Батуан шаҳридан тахминан 11 километр жануби-ғарбда, Масбате провинцияси, Лусон оролида, 10 километр чуқурликда жойлашган. Ер силкинишлари Лусон ва Филиппиннинг марказий қисмидаги бир қанча ҳудудларда, жумладан Албай провинциясидаги Легаспи шаҳрида, Сорсогон, Шимолий Самар, Ғарбий Негрос ва Жанубий Лейтеда ҳам сезилган. Вайронагарчилик ва қурбонлар ҳақида маълумотлар йўқ. АҚШ Геология хизмати зилзила магнитудаси 6,1, чуқурлиги эса 20 км деб баҳолаган.