15 февраль, 2023

Қирғизистон собиқ президенти озодликка чиқди

Қирғизистонда «қонуний ўғри» Азиз Батукаевнинг ноқонуний озод этилиши бўйича коррупцияда айбланган Алмазбек Атамбаевга чиқарилган ҳукм бекор қилинди. Бишкекдаги Первомайский район суди Қирғизистоннинг собиқ президенти Алмазбек Атамбаевга даволаниш учун мамлакатдан ташқарига чиқишга рухсат берди. ТАСС агентлиги хабарига кўра, Атамбаевни ахлоқ тузатиш колониясидан озод қилишган: бу ҳақда нашрга республика собиқ президентининг оиласи хабар берди. «Собиқ президент Алмазбек Атамбаев иккита муҳим жарроҳлик амалиётидан ўтиши керак, шундан кейин у даволаниш ва тикланиш курсларини ўташи керак бўлади», дейилади хабарда. 2022 йил июнида Бишкек суди Атамбаев ва бошқа фигурантларни 2020 йил октябрида содир бўлган оммавий тартибсизликлар иши бўйича уларнинг ҳаракатларида «жиноят таркиби йўқлиги» сабабли оқлаганди. Атамбаев суд жараёнини «цирк» деб атаган ва унда иштирок этишдан бош тортган, «сўнгги сўзни озодликка чиққанидан кейин айтиши»ни билдирганди. 2022 йил августда Атамбаев тарафдорлари унинг даволаниш учун Москвага боришига рухсат беришни сўраганди. 2023 йил 14 февраль куни Қирғизистон Олий суди собиқ президент адвокатларининг жиноят иши бўйича иш юритишни янги очилган ҳолатлар бўйича қайта бошлаш тўғрисидаги илтимосномасини қаноатлантирди. Алмазбек Атамбаев 2011-2017 йилларда Қирғизистон президенти бўлган. 2019 йилда у коррупция ва ноқонуний бойлик орттиришда айбланиб, ундан дахлсизлик ҳуқуқи олиб ташланган. Собиқ президентни қўлга олиш учун ҳуқуқ-тартибот органлари ходимлари Атамбаевнинг Қўй-Тош қишлоғидаги қароргоҳини штурм қилишга тўғри келган — унинг тарафдорлари қаршилик кўрсатган. Қирғизистонда 2020 йил 5 октябрь куни парламентнинг қуйи палатаси учун сайловлар натижалари эълон қилиниши ортидан оммавий митинглар бошланиб, тартибсизликларга айланиб кетганди. Қирғизистон парламенти ва президент маъмурияти жойлашган Оқ уй биноси ва ҳудуди эгаллангач, намойишчиларнинг бир қисми Миллий хавфсизлик давлат қўмитаси биносига йўл олганди. Давлат қўмитаси раҳбарияти билан ўтказилган музокаралардан сўнг 2019 йил августидан буён қўмита тергов изоляторида ҳибсда сақланаётган Атамбаев озодликка чиқариб юборилганди. 10 октябрь куни уни яна қўлга олишади. Қирғизистоннинг собиқ президенти криминал авторитет Азиз Батукаев ноқонуний равишда озодликка чиқарилгани бўйича иш доирасида ҳибсга олинган. 2020 йил 23 июнида у мол-мулки мусодара қилинган ҳолда 11 йилу 2 ойга озодликдан маҳрум этилади. Атамбаев давлат унвонлари, мукофот ва орденларидан ҳам маҳрум этилган. Қирғизистон давлатининг собиқ раҳбари уни адвокатлар ва оила аъзолари ҳамроҳлигида тарк этган. Кейинроқ собиқ президент Испанияда кўрикдан ўтиш ва даволаниш нияти борлигини маълум қилди. ЗАҲИРИДДИН.