15 февраль, 2023

“Кунлик тушум”, автобуслар “кимўзари”га ечим ҳақида

Эндиликда маблағ автобуснинг юрган масофаси ва одамлар бу хизматдан розилигига қараб берилади. Жамоатчилик транспорти, хусусан автобус йўналишлари, ҳаракатланиши бўйича бу каби талаб ва мажбуриятни Президент Шавкат Мирзиёев Тошкент шаҳри ва вилоят марказларида жамоат транспортининг янги тизимини жорий этиш чора-тадбирлари юзасидан ўтказган йиғилишида маълум қилган. Шунингдек, ушбу йиғилишда бу соҳада муаммолар тўпланиб қолгани, уларни ҳал этиш учун транспорт бошқармалари ва автобус паркларида ҳозирги иш тизимини ўзгартириш зарурлиги қайд этилган. Ҳатто юқорида келтирилгани каби уларнинг ечими ҳам. Бу янги тартибни тизим масъуллари, йўловчи ва ҳайдовчилар қандай қабул қилишди? Биз уларнинг фикри билан қизиқдик. Билдирилган муносабатлардан аён бўлдики, бу янги тартиб соҳадаги ечимини кутаётган кўпгина тизимли муаммоларга барҳам беради.

https://youtu.be/mfAhAp9D8qg Ахролхўжа ТОШХЎЖАЕВ, Тошкент шаҳар транспорт бош бошқармаси бўлим бошлиғи: – Эндиликда автобус йўналишларида кунлик тушум бекор қилиниб, янги тизим бўйича 1 км. учун 10 фоизлик рентабеллик билан йўналишларни белгилаш, яъни тадбиркорларга пулини молиялаштириш тизимига ўтадиган бўлдик. Жамоат транспортларида инфратузилманинг яхши ривожланмаганлиги йўловчи ва ҳайдовчиларга ҳам салбий таъсир этаётган эди. Эндликда бу масалага ҳам ечим топилди. Ундан ташқари автокорхоналарни молиялаштириш, таъмирталабларини қайта реконструкция қилиш борасида ҳам қатор кўрсатмалар олдик. Қолаверса, Тошкент шаҳридаги “Навоий”, “Амир Темур” ва “Фарғона” кўчалари сингари жами 73 та кўчада алоҳида жамоат транспортига мўлжалланган йўллар жорий этилади. Бу эса тирбандликларнинг олдини олишга хизмат қилади”. Йўловчилар фикрича, бекатларда жамоат транспортини узоқ кутиш ёки таксида юришга мажбур қилаётган муаммо бу транспорт корхоналари кунлик “тушум плани”ни бажаришга боғланиб қолганидир. Бунинг оқибати ўлароқ куннинг “энг даромадли” пайтида, яъни эрталаб ва кечга яқин ҳаракатланишга одатланганидир.
Шунингдек, йўловчилар янги жорий қилинаётган бу тизим яхши, деган фикрда. Яна улар бу билан автобусларни кўп кутиш ҳолатлари бартараф этилишидан умидвор.
Йўловчилар орасида “Автобусларни кўпайтириш керак, баъзида куни билан битта линияда 2 та автобус ҳаракатланади. Бу эса бизни кўп кутишимизга сабаб албатта” деганлар ҳам бўлди. Бир сўз билан айтганда йўловчилар автобуслар учун “кунлик тушум” талаби бекор қилиниши хизмат сифатига ижобий таъсир қилади, деган фикрда.
Автобус ҳайдовчиларининг фикри ҳам деярли йўловчиларникидан фарқ қилмайди. Ҳатто айни пайтда тизимда ҳайдовчиларнинг ойлик маошлари оширилганини улар алоҳида эътироф этишди. Яъни: “Агар шу тизим жорий қилинса, албатта бизга яхши, чунки автобуслар бир-бирини қувиш ҳолатлари бўлмайди. Ҳозир ўзи анча яхшиланди тизим, ойликлар ҳам кўтарилди” дейди биз билан суҳбатда бўлган ҳайдовчилардан бири.
Яна бир ҳайдовчи эса, “Яхши хизмат қилиш учун транспорт ҳам яхши бўлиши керакку, янгилаш керак баъзи автобусларни. Баъзи кунлари ҳатто бузилиб қолган ҳолатлари бўлиб туради. Биласизми "кунлик план"ни топиш учун ҳар куни ўйлаб бўлмайдиган ишлар бўлади. Ҳар куни ҳам белгиланган пулни топа олмайсиз, ойликни олиш учун эса уйдан пул олиб келиб бўлса ҳам "Кунлик тушум"ни ёпишимиз керак бўлади” дея муносабатини билдирди. Фикрлар турли, ҳақиқат эса ана шундай очиқлик, ошкораликда туғилади. Шу ўринда қайд этиш керакки, айни пайтда аҳолига қулай йўл ҳақи тарифларини, яъни йиллик, чораклик, ойлик, кунлик ҳаттоки соатлик йўл ҳақи тўловларини жорий қилиш масаласи кўриб чиқилмоқда. Дарвоқе, Президент ҳузуридаги тизимга оид ўтказилган йиғилишда нафақат Тошкент шаҳрида, балки вилоятлар учун ҳам муҳим топшириқлар берилган. Амалга оширилаётган саъй-ҳаракатлар натижасида келгусида жамоат транспорти соҳасида сезиларни ўзгаришларни кутиб қоламиз.

Аббосжон ИМОМОВ