12 февраль, 2023

Туркиядаги зилзила қурбонлари сони 29 мингдан ортди

Туркияда содир бўлган икки кучли зилзила қурбонлари сони Тошкент вақти билан соат 17:55 ҳолатига кўра 29 605 кишига етди. Бу ҳақда Туркия Фавқулодда вазиятларнинг олдини олиш ва оқибатларини бартараф этиш бошқармаси (AFAD) хабар берди. Туркиянинг 10 вилоятида қурбонлар сони 29 605 кишига етди, 147 934 киши табиий офат зонасидан эвакуация қилинди. 6 февраль, душанба куни Туркиянинг жануби-шарқида 7,7 балл ва 7,6 балл) магнитудаси етти баллдан ортиқ бўлган иккита зилзила содир бўлди. Президент Ражаб Тоййиб Эрдўғон Туркияда табиий офат қурбонлари муносабати билан етти кунлик миллий мотам эълон қилди. Туркия давлат байроқлари бутун мамлакат бўйлаб яримга ҳилпиратилди. Вайронкор зилзила қўшни давлатлар, жумладан, Сурия, Ливан, Шимолий Кипр Турк Республикаси, Греция Кипр ва Ироқда ҳам сезилди. Охирги маълумотларга кўра, Суриянинг Идлиб, Ҳалаб, Хама, Латакия ва Раққа вилоятларида 3,5 мингдан ортиқ одам ҳалок бўлган.