09 февраль, 2023

18 минг ўринли ётоқхона қурилиши ваъда қилиняпти

2023 йил давлат дастури лойиҳасига кўра, йил якунига қадар олий таълим муассасаларида 18 минг ўринли талабалар турар жойларини қуриш, ушбу лойиҳалар доирасида қурилаётган талабалар турар жойларини фойдаланишга топшириш режалаштирилмоқда. Бу ўқув йилида талабалар ётоқхонаси ҳар йилгидан-да шов-шувлироқ ва муаммолироқ бўлди. Ётоқхона етишмаслиги натижасида талабалар пойтахт бўйлаб сарсон бўлишди, уй тополмай, кўчаларда, машиналарда тунаб қолишди. 2023 йил февраль-сентябрь ойларида Қорақалпоғистон Вазирлар Кенгаши, вилоятлар ва Тошкент шаҳар ҳокимликлари талабалар турар жойларини қуриш учун ер майдонларини ажратади. Давлат-хусусий шериклик лойиҳалари, олийгоҳ ва бюджет маблағлари ҳамда инвестиция дастури доирасида талабалар турар жойларини қуриш бўйича лойиҳа ҳужжатларини расмийлаштирилади. Шунингдек, энди талабаларни ётоқхонага онлайн жойлаштириш имкониятларини берувчи Давлат хизматлари маркази ва Ягона интерактив давлат хизматлари портали орқали кўрсатиладиган бепул электрон хизмат ҳам жорий этилади. Бу хизматни ишга тушириш учун берилган муддат — 2023 йил май. Бунда:

ётоқхоналар ҳисобини юритиш реестрини ишлаб чиқиш;
ижтимоий ҳимояга муҳтож талабаларни устувор равишда жойлаштириш;
Ягона интерактив давлат хизматлари портали орқали электрон ариза бериш ва тўловларни амалга ошириш имкониятини яратиш назарда тутилади.