Камолиддин Раббимов: “Сурия халқига ҳам ёрдам бериш чораларини топишса, янада яхши бўларди”
“Маълумотларга кўра, зилзила қурбонлари сони 8 мингга яқин, омон қолганларни топишга умид камаймоқда. Туркия ва Суриядаги зилзиланинг оқибатлари кўпчилик ўйлагандан кўра каттароқ ва фожиалироқ экани маълум бўляпти. Туркиянинг ўзида вафот этганлар сони, кечаги маълумотларга кўра беш минг атрофида экан. Лекин, ҳали аксарият бузилган уйларнинг остидаги одамлар чиқарилгани йўқ, шунинг учун улар тириклар ёки вафот этганлар сафига қўшилмаган. Euronews’нинг айтишича, вафот этганлар сони саккиз баравар кўп бўлиши мумкин экан. Қиёслаш учун, 1966 йилда Тошкентдаги жуда кўплаб уйларнинг бузилишига сабаб бўлган зилзиланинг кучи 5.2 бал бўлган экан. Маълумотларга кўра, ўшанда саккиз инсон вафот этган, юзлаб одамлар жароҳатланган. Туркиядаги зилзила эса 7.2-7.8 бални ташкил қилган, ер бир неча марта такрорий қимирлаган. Мана шу фожиа фонида, кўплаб давлатлар қатори, Ўзбекистон ҳам юздан ортиқ қутқарувчини, беш-олтита кинологдан иборат гуруҳни юборгани – бироз бўлса-да таскин беради. Ўзбекистоннинг, туркий давлатларнинг ёрдами, бошқаларникидан кўп бўлса бўлиши керак, лекин кам эмас. Имкон топиб, Сурия халқига ҳам ёрдам бериш чораларини топишса, янада яхши бўларди. Балки, Сурияга ҳам ёрдам берилаётгандир, мен бехабардирман...” деб ёзган у ўзининг ижтимоий тармоқдаги саҳифасида.
