29 январь, 2023

Нукусдаги кўп қаватли уйда газ портлади

Бугун, 29 январь куни соат 16:15 атрофида Нукус шаҳри «Темир жол» МФЙда жойлашган 4 қаватли уйда ҳаво-газ аралашмасининг чақнаши содир бўлди. Бу ҳақда Ўзбекистон фавқулодда вазиятлар вазирлиги матбуот хизмати хабар берди. Натижада, уйдаги бир нечта хонадонларнинг том ва пол қисмлари ўпирилиб, 4-қаватдан 1-қаватгача тушиб кетган. Шунингдек, воқеа натижасида 2 нафар фуқаролар енгил тан жароҳати билан шаҳар шифохонасига жойлаштирилганлиги билдирилган эди, иккала жабрланган фуқаролар зарурий тиббий ҳамда психологик ёрдамни олишган ва айни вақтда улар шифохонадан чиқарилган. Айни вақтда Фавқулодда вазиятлар вазирлиги ва тегишли идоралар томонидан бинонинг қулаган конструкцияларини тозалаш ишлари олиб борилмоқда. Ҳодиса жойига Қорақалпоғистон Жўқорғи Кенгесининг раиси Аманбай Оринбаев ва Вазирлар Кенгаши раиси Фарход Эрманов етиб борди.

"Вазият Фавқулодда вазиятлар вазири томонидан назоратга олинган. Ҳодиса юзасидан қўшимча маълумот тақдим этилади", — дейилади хабарда.