27 январь, 2023

Фарғонадан Қирғизистонга микроавтобус қатнови қайта тикланди

26 январдан эътиборан «Фарғона – Қувасой – Қизил-қия» халқаро йўналишида микроавтобус қатнови қайта тикланди. Бу ҳақда Транспорт вазирлиги матбуот хизмати хабар берди. Фарғона ва Қирғизистоннинг Баткен вилоятидаги Қизил-қия шаҳри ўртасида амалга ошириладиган мазкур қатнов икки чегарадош вилоят ўртасидаги борди-келди учун муҳим йўналишлардан бири ҳисобланади. 2020 йилгача мавжуд бўлган мазкур қатнов, пандемия даври чекловларида тўхтаб қолган эди. Қирғизистон томонидан «Қизил-қия PATP», Ўзбекистон томонидан эса «Daewoo Trans Servis» МЧЖ хизмат кўрсатувчи йўналиш умумий масофаси 39,5 кмни ташкил этиб, йўлкира нархи 12 минг сўм этиб белгиланди. Микроавтобуслар Қизил-қия ва Фарғонадан тонги соат 7:20 да ҳаракат бошланиши назарда тутилган. Келгусида аҳоли талаб ва эҳтиёжларини инобатга олган ҳолда қатновларни кўпайтириш режалаштирилмоқда.