20 январь, 2023

Нурсултон Назарбоевнинг юраги операция қилинди

Қозоғистон биринчи президенти Нурсултон Назарбоевнинг юраги операция қилинди. Бу ҳақда Назарбоевнинг матбуот котиби Айдос Укибайга таяниб Tengrinews хабар берди.

«Нурсултон Назарбоевнинг юрагида жарроҳлик амалиёти ўтказилди. Операция муваффақиятли кечди. Биринчи президентнинг ҳаётига нисбатан хавф йўқ. Ҳозир у кузатув остида», — деб ёзди Айдос Укибай Twitter’да.

Унинг сўзларига кўра, операция Миллий илмий кардиожарроҳлик марказида таниқли кардиожарроҳ Юрий Пя раҳбарлиги остида ўтказилган. Аввалроқ Нурсултон Назарбоевнинг Остонадаги касалхоналардан бирига ётқизилгани ҳақида хабар берилганди.