18 январь, 2023

Ўзбекистонда 2022 йилда 102 хизматига қарийб 3 миллионга яқин қўнғироқ бўлди

Ўзбекистонда 2022 йилда 102 тизими Call-марказларига 2 миллион 864 минг 778 та қўнғироқ бўлди. Бу ҳақда ИИВ ахборот хизмати хабар берди. Қайд этилишича, янги 102 тизими колл-марказлари 2020 йил сентябрь ойидан 2021 йил якунига қадар уч босқичда ишга туширилди. 2022 йил якуни бўйича 102 – колл-маркази томонидан қабул қилинган қўнғироқлар сони – 2 миллион 864 минг 778 тани ташкил этди. 102 тизими замонавий ахборот-коммуникация технологиялари ва геоахборот тизимлари билан жиҳозланган. Тизим ягона кластер ва платформага бирлаштирилган. Ахборот хавфсизлиги таъминланган бўлиб, домен назорат тизими билан дастурий-техник ҳимояланган. Тизимга нафақат ҳуқуқбузарлик ва жиноятлар, балки кўмакка муҳтож шахслар, хусусан, қариялар ҳам қўнғироқ қилиб туради. Бундай вазиятда хабарлар манзил бўйича профилактика инспекторларига етказилади ва зарурий ёрдам амалга оширилади.