13 январь, 2023

Ўзбекистонда 5 йилда 571 та мактаб қурилди

Ўзбекистонда 2017–2021 йилларда умумтаълим мактаблари сони 571 тага кўпайди. Бу ҳақда "Тараққиёт стратегияси" маркази хабар берди. Маълум қилинишича, ҳаракатлар стратегияси доирасида умумтаълим мактаблари сони 2017 йилги 9 718 тадан, 2021 йилда 10 289 тага кўпайди. Жумладан, 135 та нодавлат умумтаълим мактаблари, 14 та Президент мактаблари фаолияти йўлга қўйилди. Натижада, мактаблардаги ўқувчилар сони 5 271,3 минг нафардан 6 304,6 минг нафарга етди. Кенг жамоатчилик ва ота-оналарнинг фикр-таклифлари асосида мамлакатда 11 йиллик мажбурий мактаб таълими қайта жорий этилди. Шунингдек, хорижий экспертлар иштирокида бошланғич синфлар учун 170 номдаги янги авлод дарсликлари яратилди. 2020-2025 йилларда халқ таълими тизимида инклюзив таълимни ривожлантириш концепцияси қабул қилинди.