11 январь, 2023

Бухорода Қорақалпоғистондаги оммавий тартибсизликларда иштирок этган 22 нафар фуқаронинг суд иши кўрилмоқда

Бухоро вилоят суди биносида 2022 йил 1-2 июль кунлари Нукус шаҳрида содир этилган оммавий тартибсизликлар бўйича 22 нафар судланувчига оид жиноят ишини очиқ суд жараёнида кўриб чиқиш давом эттирилмоқда. Бугунги суд мажлисида тарафларнинг музокаралари эшитилди. Бу ҳақда Олий суд Жамоатчилик ва ОАВ билан алоқалар бўлими бошлиғи Азиз Абидов ўзининг телеграмдаги расмий саҳифасида маълум қилди. Хусусан, давлат айбловчиси судланувчиларга айбланаётган моддалар бўйича уларнинг айбини енгиллаштирувчи ва оғирлаштирувчи ҳолатларни инобатга олган ҳолда қонунда белгиланган тартибда жазо тайинлашни сўради. Шунингдек, судланувчи Саламат Калилаев ҳимоячисининг музокара сўзи тингланди. Маълумот учун, қолган тарафларнинг музокаралари 12 январь куни ўтказиладиган суд мажлисида эшитилади.