05 январь, 2023

10 йил озодликдан маҳрум қилинган собиқ бош прокурор Рашид Қодиров озодликка чиқди

2000-2015 йилларда Ўзбекистоннинг бош прокурори лавозимида фаолият кўрсатиб келган Рашид Қодиров 3 йил аввал пора беришга далолат қилиш, фирибгарлик, солиқлар ёки бошқа мажбурий тўловларни тўлашдан бўйин товлаш, тергов қилишга ва суд ишларини ҳал этишга аралашиш, жиноий фаолиятдан олинган даромадларни легаллаштириш каби ҳокимият, бошқарув ва жамоат бирлашмалари органларининг фаолият тартибига қарши бир қатор оғир ва ўта оғир жиноятларни содир қилганликда айбли деб топилганди. Унга нисбатан 10 йил озодликдан маҳрум қилиш ва иш ҳақи минимумининг 500 баравари миқдорида жарима жазоси тайинланганди. Барча давлат мукофотлари ва унвонларидан маҳрум қилинганди. Маҳаллий интернет нашрлар бугун Ўзбекистоннинг энг қудратли шахсларидан бири бўлган собиқ бош прокурор Рашид Қодировнинг қамоқдан озод этилгани ҳақида ёзмоқда. Аммо расмий манбалар ҳозирча бу ҳақда маълумот эълон қилгани йўқ. Шунга қарамай, platina.uz бу маълумот аниқлигига очиқ энциклопедия – VIKIPEDIYA маълумотларига таяниб ишонч ҳосил қилди. Мазкур очиқ энциклопедияда собиқ бош прокурор Рашид Қодиров ҳақидаги маълумотлар охирги марта 2023 йил 5 январ санасида соат 02.01 да унинг 2022 йил декабрда афв этилиб озодликка чиқарилгани ҳақидаги маълумот билан янгиланган. Эслатиб ўтамиз: Ўзбекистон собиқ бош прокурори Рашид Қодиров 2018 йил февралида қўлга олинган эди. Ўшанда унга нисбатан Жиноят кодексининг 165 (товламачилик), 205 (ҳокимият ёки мансаб ваколатини суиистеъмол қилиш) ва 210 (пора олиш) моддалари билан жиноят иши қўзғатилганди. Дарвоқе... Президент Шавкат Мирзиёев собиқ бош прокурор ўз қилмишлари ҳақида ойнаи жаҳон орқали гапириб беришини айтган эди. Аммо бу намойиш бўлгани йўқ.