04 январь, 2023

Қашқадарёда бозорчилар ҳоким ўринбосарини дўппослади

Қашқадарё вилояти Қамаши туманининг «Алишер Навоий» МФЙ ҳудудидаги «Файз» деҳқон бозори атрофида сотувчилар жанжал чиқарди. Ҳолат юзасидан вилоят ИИБ хабар берди. Маълум қилинишича, 2 январь куни тахминан соат 10:30 ларда Қамаши тумани ҳокимининг ўринбосари М.Н. ва шу бозор раҳбари А.А.лар томонидан бозор ҳудудида ободонлаштириш ишларини олиб бориш ҳамда бозор атрофига бетон ариқ ўрнатиш мақсадида туман Ободонлаштириш бўлимига қарашли экскаватор машинасини ишлатаётган вақтда “Файз” деҳқон бозори ҳудудида савдо ишлари билан шуғулланувчи Қамаши туманида яшовчи фуқаролар Қ.С., Б.Н., Т.З. ва И.А. ҳеч бир сабабсиз жанжал чиқарган.

Жанжал вақтида фуқаролар З.Т. ва Н.Б. қўллари билан ҳоким ўринбосари М.Н. қасддан бир неча маротаба уриб, Қамаши тумани Ободонлаштириш бўлимига қарашли экскаватор машинаси ойнасига тош отиб синдириб, “Файз” номли МЧЖ раҳбари А.А.га тегишли “Nexia-2” русумли автомашинага зарар етказиб, фуқароларни фаол қаршилик кўрсатишга жалб қилган.

Воқеа жойига Қамаши туман ИИБ ходимлари чиқиб, фуқароларни тинчлантириб, жамоат тартиби сақлашга эришилган.

Мазкур ҳолат юзасидан Қамаши туман ИИБ ҳузуридаги ТБ томонидан Ўзбекистон Республикаси Жиноят кодексининг 277-моддаси 3-қисми билан жиноят иши қўзғатилиб, тергов ҳаракатлари олиб борилмоқда.