02 январь, 2023

Air Astana авиакомпаниясининг Тошкент-Олмаота рейси йўловчилари жабрланди

Air Astana авикомпаниясининг Тошкент-Олмаота рейси самолёти турбулентлик ҳудудига тушиб қолиши натижасида йўловчилар жабрланди. Бу ҳақда компания матбуот хизмати хабар берди. «Бугун авиакомпания Тошкент-Олмаота йўналиши бўйича KC 128 рейсини амалга оширди. Самолёт маҳаллий вақт билан 14:35 да ҳавога кўтарилган. Парвоз вақтида самолёт тўсатдан кучли турбулентлик ҳудудига тушиб қолди. Дастлабки маълумотларга кўра, етти нафар йўловчи турли тан жароҳатлари олган», — дейилади хабарда. Қайд этилишича, самолёт 16.45 да Олмаотага қўнди. Парвоз экипажи йўловчиларга биринчи тиббий ёрдам кўрсатган. Учувчилар воқеа ҳақида аэропорт хизматларини хабардор қилган. Тез ёрдам машиналари ёрдам кўрсатиш учун аэропортда йўловчиларни кутмоқда. Авиакомпания содир бўлган воқеадан афсусда ва рейс йўловчиларига ҳар томонлама ёрдам беради. Воқеа ваколатли органлар томонидан текширилади.