22 декабрь, 2022

Жиззахда Янги йил арчаси ёниб кетди

Бугун, 22 декабрь куни Жиззахда Янги йил арчаси ёниб кетди. Бу ҳақда ҳолат бўйича вилоят Фавқулодда вазиятлар бошқармаси хабар берди. Маълум қилинишича, бугун соат 18:01 да вилоят Фавқулодда вазиятлар бошқармаси Навбатчилик қисмига Жиззах шаҳар Мирзо Улуғбек маҳалласи Тошкент кўчаси ҳудудида жойлашган “Марказий деҳқон бозори”нинг автотураргоҳида бозор маъмурияти томонидан ўрнатилаётган “Янги йил арчаси”да ёнғин содир бўлаётганлиги тўғрисида хабар келиб тушган. Хабарга кўра, зудлик билан ФВБнинг 2 та ёнғин-қутқарув экипажи воқеа жойига етиб борган. Ушбу ёнғин фуқаролар томонидан ўчириб олинган. Ёнғин оқибатида арчанинг 40 см юқори қисми ёниб зарарланган. Маълум бўлишича, безак сифатида ўрнатилаётган чироқларни ёқиб синовдан ўтказиш вақтида ёнғин содир бўлган. Фуқароларнинг куйиш тан жароҳати олиш ва ҳалок бўлиш ҳолатлари қайд этилмаган.