21 декабрь, 2022

Ўзбекистон ва Қозоғистон ТИВ раҳбарлари ўринбосарлари давлат чегарасини якуний халқаро-ҳуқуқий расмийлаштириш масалаларини кўриб чиқди

ТИВ маълумотига кўра, томонлар Ўзбекистон ва Қозоғистон муносабатларининг бугунги ҳолати ва ривожланиш истиқболларини муҳокама қилди. Ҳозирги босқичда Ўзбекистон-Қозоғистон яхши қўшничилик ва стратегик шериклик муносабатлари олий даражадаги келишувларга мувофиқ изчил мустаҳкамланиб бораётгани чуқур мамнуният билан қайд этилди. Қозоғистон Президентининг мамлакатимизга бугун бошланган давлат ташрифининг ташкилий ва мазмун жиҳатларига алоҳида эътибор қаратилди. Мазкур тадбир амалий ҳамкорликни чуқурлаштириш, давлатларимиз ва бутун минтақанинг барқарор ривожланишига хизмат қилиши таъкидланди. Музокараларда Ўзбекистон-Қозоғистон давлат чегарасини якуний халқаро-ҳуқуқий расмийлаштириш масалалари ҳам кўриб чиқилди. Ўзбекистон-Қозоғистон қўшма демаркация комиссиясининг самарали фаолияти ва яхши қўшничилик муносабатларини мустаҳкамлаш ва мамлакатлар ўртасидаги савдо-иқтисодий алоқаларни чуқурлаштириш учун чегара демаркациясини якунлаш муҳимлиги қайд этилди. Учрашув анъанавий илиқ ва дўстона муҳитда ўтди.