19 декабрь, 2022

Қозоғистон Президенти 21-22 декабрь кунлари давлат ташрифи билан Ўзбекистонда бўлади

Президент Шавкат Мирзиёевнинг таклифига биноан, Қозоғистон Президенти Қасим-Жомарт Тоқаев жорий йил 21-22 декабрь кунлари давлат ташрифи билан мамлакатимизда бўлади. Давлатимиз раҳбари матбуот хизмати маълумотига кўра, ташриф дастурига мувофиқ, олий даражадаги музокараларда икки томонлама ва минтақавий аҳамиятга молик долзарб масалалар муҳокама қилинади. Саммит кун тартибидан Ўзбекистон-Қозоғистон стратегик шериклик ва иттифоқчилик муносабатларини янада чуқурлаштириш, ўзаро савдо ҳажмини ошириш, саноат кооперацияси бўйича ўзаро манфаатли қўшма лойиҳаларни илгари суриш, қишлоқ хўжалиги, транспорт ва логистика соҳаларидаги ҳамкорликни кенгайтириш, фаол ҳудудлараро ва маданий-гуманитар алмашувларни давом эттириш каби асосий масалалар ўрин олган. Давлат раҳбарлари бир қатор йирик инвестиция лойиҳаларини бошлаб бериши режалаштирилмоқда. Учрашувлар якунида амалий ҳамкорликнинг устувор йўналишлари бўйича икки томонлама битимларнинг салмоқли тўпламини қабул қилиш кўзда тутилган.