18 декабрь, 2022

Қозоғистон Россияни четлаб ўтиб, Хитой ва Эронга нефть экспортини ривожлантиришни режалаштирмоқда

Қозоғистон Хитой ва Эрон йўналишида нефть экспорти йўналишларини ривожлантириш ниятида. Бу ҳақда республика энергетика вазири Болат Оқчулаков маълум қилди, дея хабар бермоқда Inbusiness.kz. Мулозимнинг таъкидлашича, бундай чора нефть экспортининг муқобил йўналишларини ривожлантириш бўйича “Йўл харитаси” лойиҳасида мавжуд. “Шундай қилиб, асосий эътибор Озарбайжон, Грузия ва Туркия портлари йўналиши бўйича Транскаспий халқаро транспорт йўналишини, шунингдек, Хитой ва Эронга экспорт йўналишларини ривожлантиришга қаратилади”, - деди Акчулаков. Бугунги кунда Қозоғистон ўз нефтининг қарийб 80 фоизини Каспий қувурлари консорциуми (CПC) орқали Қора денгиздаги Россия портига экспорт қилиш учун юборар эди. Ўтган ёзда республика президенти Қосим-Жомарт Токаев ҳозирги геосиёсий вазият билан боғлиқ ҳолда нефть етказиб беришни диверсификация қилишга чақирди. Ўшандан бери республика хомашёни Россия Федерациясини четлаб ўтиб экспорт қилиш масаласини бир неча бор кўтарди. 2021 йил охирида Қозоғистон Хитойга 1,9 миллиард долларлик хом нефть ва нефть маҳсулотларини экспорт қилган (йил охирида республика 31,1 миллиард долларлик нефть экспорт қилганига қарамай). Эронга келсак, аввалроқ Қозоғистон SWAP схемаси бўйича Ислом Республикасига нефть жўнатган. Ёқилғи Қозоғистоннинг Актау портидан Эроннинг шимолий портларига танкерлар орқали етказилган, у ердан эса Эроннинг Табриз ва Теҳрондаги нефтни қайта ишлаш заводларига жўнаган. Ўз навбатида Эрон ҳам худди шундай миқдордаги нефтни Форс кўрфазидаги танкерларга жўнатган. Транскаспий халқаро транспорт йўналиши Хитой, Қозоғистон, Каспий денгизи, Озарбайжон, Грузия ва ундан кейин Европа мамлакатларига ўтади. Аслида, бу лойиҳа Хитойдан Европага товарларни етказиб бериш учун Россия Транс-Сибир темир йўлига муқобилдир. Маршрутга кўра, аввалроқ Қозоғистон томони таъкидлаганидек, йилига 10 миллион тоннагача юк, жумладан, 200 мингтагача контейнер ташиш мумкин.

қозоғистон