16 декабрь, 2022

Тошкентда 42 млн сўмлик сарёғни ўғирлаб кетишда гумонланган шахс ушланди

Тошкент шаҳри Чилонзор туманидаги дўконлардан бирида 42 миллион сўмлик сарёғни ўғирлаганликда гумонланган шахс аниқланди. Бу ҳақда пойтахт ИИББ матбуот хизмати хабар берди. Хабарда айтилишича, Чилонзор ИИО ФМБга 1 декабрь куни келиб тушган хабарга кўра, жорий йилнинг 15 октябрдан 30 ноябрь кунигача бўлган вақт оралиғида, номаълум шахс, шу тумандаги дўконларнинг биридан жами 42.320.000 сўмлик сарёғни ўғирлаб кетганлиги маълум бўлган. Кўрилган чора-тадбирлар натижасида, ушбу жиноятни содир этишда гумон қилинган ҳамда дўконга ҳаридор сифатида келиб юрган 33 ёшли Яшнар Ю. аниқланиб, қўлга олинди. Мазкур ҳолат юзасидан Ўзбекистон Республикаси Жиноят кодексининг 169-моддаси (ўғрилик) билан жиноят иши қўзғатилган. Тергов давом этмоқда.