Михаил Саакашвили 9 йиллик қамоқ жазосига ҳукм қилинди
Собиқ президент қиммат курортларда дам олиш, косметик клиникалар ва кийим-кечак сотиб олишга қарийб саккиз миллион лари сарфлашда айбланган.
Грузиянинг собиқ президенти тўққиз йиллик қамоқ жазосига ҳукм қилинди.
Михаил Саакашвили 2009-2013 йилларда бюджет маблағларини ўзлаштирганликда айбдор деб топилган. Прокуратура маълумотларига кўра, бу вақт ичида собиқ президент қиммат курортларда дам олиш, гўзаллик клиникаларига ташриф буюриш ва кийим-кечак сотиб олишга қарийб саккиз миллион лари сарфлаган.
"Рўйхатда Лондонда 28 600 долларга сотиб олинган еттита куртка ва кашмир спорт пальтоси, шунингдек, 4 600 долларга қўлда ишланган иккита костюм бор", деб ёзади Грузиянинг Newsgeorgia нашри.
Қимматбаҳо кийим-кечаклар туфайли суд жараёни "кўйлак иши" деб аталди.
Тбилиси суди қарори билан Саакашвили тўққиз йиллик қамоқ жазосига ҳукм қилинди. Собиқ сиёсатчи ҳукмга рози эмас. Унинг таъкидлашича, "кўйлак иши" унинг коррупцияга қарши курашчи обрўсига путур етказиш учун очилган.
Бу Саакашвилининг "Грузия орзуси" партияси ҳукмронлиги давридаги учинчи ҳукмидир. У аллақачон сиёсий рақибларига ҳужум уюштиргани учун жазони ўтамоқда. Бундан ташқари, яна иккита иш кўриб чиқилмоқда.
Эслатиб ўтамиз, Грузиядаги оммавий норозилик намойишлари фонида 2024 йил декабр ойи охирида Михаил Кавелашвили расман мамлакат президенти лавозимини эгаллаган эди.
