Трамп маъмурияти Ўзбекистонни бошқаларга намуна қилиб кўрсатди
АҚШ Ички хавфсизлик вазири Кристи Ноэм 131 нафар муҳожирнинг ортга қайтарилиши ҳақида гапирди.
Ўзбекистон томони 131 ноқонуний муҳожирни ортга қайтарди. Бу АҚШ томонидан олқишланган.
Қайтарилганлар орасида ўзбекистонликлардан ташқари, Қозоғистон ва Қирғизистон фуқаролари ҳам бор.
АҚШ Ички хавфсизлик вазири (DHS) Кристи Ноэм 131 нафар ноқонуний муҳожирни ўз ватанига қайтариш учун чартер рейс ташкил этгани учун Ўзбекистон президенти Шавкат Мирзиёевни алоҳида эътироф этган.
“Хавфсизликни мустаҳкамлаш ва қонун устуворлигини таъминлаш бўйича Ўзбекистон билан ҳамкорликни давом эттиришни интиқлик билан кутамиз”, дейди америкалик амалдор.
Fox News Трамп маъмуриятига таяниб ёзишича, ушбу репатриация битими АҚШнинг бошқа давлатлар билан миграция масалалари бўйича қандай ҳамкорлик қилишини кўрсатиб берадиган намуна ҳисобланади. Битим АҚШ Давлат департаменти, Ички хавфсизлик вазирлиги, Оқ уй ва Миллий хавфсизлик кенгаши ҳамда Ўзбекистон ҳукумати ўртасида бир неча ой давом этган дипломатик музокаралар натижаси саналади.
