Antistrumin dorisi boʻyicha 3 kishi qamoqqa olindi
Bu haqda Platina.uz saytiga Oliy sud matbuot xizmati rahbari maʼlum qildi.
Yoddan ommaviy zaharlanish boʻyicha Toshkentda 3 kishi qamoqqa olindi. Rossiyaning RIA novosti xabariga koʻra, ularga antistrumin boʻyicha ish ochilgan.
Oliy sud matbuot xizmati rahbarining Platina.uz saytiga maʼlum qilishicha, 2023 yil 7 noyabr kuni jinoyat ishlari boʻyicha Yashnobod tumani sudining ajrimi bilan quyidagilarga nisbatan qamoqqa olish ehtiyot chorasi qoʻllanildi:
- Yo.X.Toʻraqulov nomidagi respublika ixtisoslashtirilgan endokrinologiya ilmiy-amaliy tibbiyot markazi direktorining davolash ishlari boʻyicha oʻrinbosari F.H.;
- ushbu markaz laboratoriya mudiri, katta ilmiy xodim, Sogʻliqni saqlash vazirligi bolalar bosh endokrinologi N.A.;
- 16 noyabr kuni Sogʻliqni saqlash vazirligi dori vositalari, tibbiy buyumlar va jihozlar muomalasini tartibga solish va muruvvat yordamini muvofiqlashtirish boshqarmasi boshligʻi H.Gʻ.
Eslatib oʻtamiz, Chust tumanida ommaviy zaharlanish kuzatilgan, keyinroq bu holat Andijonda ham sodir boʻlgan. Vaziyat esa prezident tomonidan nazoratga olingan. Sogʻliqni saqlash vaziri oʻrinbosari esa bolalar ovqat yo doridan zaharlanmaganini aytgandi.
Keyinroq bu boʻyicha jinoiy ish ochilgan. Antistrumin dorisini ishlab chiqargan korxona rahbari esa xalqaro qidiruvda ekani, shu holida bir nechta shubhali shartnomalar qilganini ham xabar bergandik.
