Putin Oʻzbekistonga gaz eksporti qachon boshlanishini aytdi
Avval Qozogʻiston tomoni gaz eksporti nega kechikayotgani boʻyicha maʼlumot bergandi.
Rossiya joriy oktabr oyidan Qozogʻiston va Oʻzbekistonga gaz yetkazib berishni boshlaydi. Bu haqda Rossiya prezidenti Vladimir Putin "Valday" forumining yalpi majlisidagi chiqishi chogʻida maʼlum qildi, deb yozadi Lenta nashri.
Uning soʻzlariga koʻra, dastlab Rossiya uch milliard kub metr gaz yetkazib beradi, keyinroq bu hajmlarni oshirish mumkin.
Uchrashuvda Putin, shuningdek, Rossiya Gʻarb davlatlariga gaz tranziti uchun Ukrainaga nega pul toʻlayotganini ham tushuntirdi. Uning soʻzlariga koʻra, bu "bu tranzit mamlakat boʻlgani uchun hamkasblar oldidagi majburiyatlarni bajarish kerak".
Biroz avval Qozogʻiston tomoni gaz eksporti nega kechikayotgani boʻyicha izoh bergan.
Eslatib oʻtamiz, iyun oyida Sankt-Peterburg Xalqaro iqtisodiy forumida Rossiya gazini Oʻzbekistonga yetkazib berish boʻyicha shartnoma imzolangandi.
Oldinroq esa Rossiya Oʻzbekiston va Qozogʻiston bilan tabiiy gaz yetkazib berish hajmini oshirish masalasini muhokama qilayotgani maʼlum boʻlgandi.