Uchkoʻprik tumani hokimi lavozimidan ozod etildi
Abrorjon Asqarov 2022 yil may oyida hokimlikka tayinlangandi.
Fargʻona viloyati Uchkoʻprik tumani hokimi Abrorjon Asqarov egallab turgan lavozimidan ozod etildi.
Bu haqda Xalq deputatlari Uchkoʻprik tumani kengashi qarori eʼlon qilingan. Mazkur hujjat bilan hokimni ishdan olish boʻyicha Fargʻona viloyati hokimi Xayrullo Bozorovning 2024 yil 6 fevraldagi qarori tasdiqlangan.
Maʼlumot uchun, Abrorjon Asqarov 1984 yil Buvayda tumanida tugʻilgan. Fargʻona politexnika institutini tamomlagan. 2004 yildan bank-moliya tizimida mehnat qilib kelgan, 2018–2019 yillarda "Mikrokreditbank" aksiyadorlik-tijorat banki Fargʻona viloyati filiali boshligʻi, 2019 yildan Uchkoʻprik tumani hokimining iqtisodiyot va tadbirkorlik masalalari boʻyicha birinchi oʻrinbosari lavozimida faoliyat yuritgan.
Uchkoʻprik tumaniga 2022 yil may oyida hokim etib tayinlangandi.
Eslatib oʻtamiz, kecha 14 fevral kuni Oltinkoʻl, Xoʻjaobod, Uchqoʻrgʻon va Ellikqalʼa tumanlariga hokimlar tayinlangandi.