Yana 18 hokim ishdan olinishi kutilmoqda
Bosh vazir ularning lavozimga loyiqligini koʻrib chiqadi.
Oʻzbekistonda yana 18 ta hokim ishdan ketishi mumkin. Bu haqda Prezident yigʻilishida maʼlum qilindi.
Oʻtgan yili 5 ta - baliqchilik, parrandachilik, zargarlik, asalarichilik, ipakchilik tarmoqlarida xorijiy investitsiyani jalb qilish ishlari eng sust darajada boʻlgani koʻrsatib oʻtildi.
Xorijiy investitsiyalar hajmi 2023 yilda 1,6 barobar oʻsgan boʻlsa-da, eng katta salohiyatga ega Samarqand va Toshkent shahrida bu koʻrsatkich imkoniyatga yarasha boʻlmadi.
Shuningdek, 12 ta tuman va shaharda oʻzlashtirilgan jami investitsiyalar oʻtgan yilga nisbatan kamaygan.
Yoki, 6 ta tuman va shaharda oʻzlashtirilgan investitsiya 10 million dollarga ham yetmagan.
Masalan, Shofirkon, Yangiobod, Nurobod, Paxtachi, Furqat va Xiva tumani hokimlariga konsalting kompaniyalar tomonidan 800 million dollarlik 241 ta tayyor investitsiya loyiha takliflari ishlab berilgan boʻlsa-da, hokimlar tayyor loyihalarga ham investor topmagan.
Bosh vazirga ushbu kamchiliklar qayd etilgan 18 ta tuman va shahar hokimlarining lavozimga loyiqligini koʻrib chiqish topshirildi.
Eslatib oʻtamiz, avvalroq ikki amaldor ishdan olingan, Bosh vazir oʻrinbosari Jamshid Xodjayev ogohlantirilib, 10 nafar hokimga chora koʻrilishi belgilangandi.
Bundan tashqari adliya va transport vazirlari ham ogohlantirildi.
