Fargʻonada bir guruh jinoyatchilar ushlandi
Fargʻona viloyatida tezkor vaziyat barqarorligini taʼminlash, jinoyatchilikni jilovlash borasida hamkorlikdagi tezkor-qidiruv profilaktik tadbirlari davom etyapti.
Fargʻonada kriminogen muhitda mavqega ega boʻlgan 248 nafar shaxsning yashash va boshqa manzillarida kompleks tezkor qidiruv tadbirlari oʻtkazildi.
Oʻtkazilgan tadbirlarda 66 ta jinoyat aniqlandi;
- 4 kg. 749 gramm giyohvandlik vositalari;
- 78 dona psixotrop va kuchli taʼsir qiluvchi moddalar;
- 41 ta qurol, oʻq dorilar va sovuq qurol;
- 45 dona turli xil kompyuter, telefon hamda diniy adabiyotlar;
- jinoyat sodir etib, sud va tergov organlaridan yashiringan 37 nafar qidiruvdagi shaxs qoʻlga olindi.
Bundan tashqari, oʻtkazilgan maxsus tadbirlar davomida guruhbozlik qilgan 22 nafar shaxs bezorilik ustida ushlangan.
Shuningdek, 22 noyabr kuni Oltiariq tumanida guruhbozlikka intiluvchi ikki guruh vakillari A.R. va T.M. oʻrtasida janjal kelib chiqqan. Oʻtkazilgan tezkor ishlar davomida 15 nafar guruhboz va ularning izdoshlari qoʻlga olingan.
27 noyabr kuni sportchi X.T. guruhbozlikka intilib, atrofiga shaxslarni yigʻib, Qoʻqon shahrida ikki shaxsga tan jarohati yetkazib, hodisa joyidan yashiringan vaqtda ushlangan.
Uyushgan guruhga rahbarlik qilib, fuqarolarni tovlamachilik va mulklarni boshqa yoʻllar bilan talon-toroj qilgan A.Mamirov jinoyat ustida qoʻlga olinib, tergov organlariga topshirilgan.
Avvalroq “Sayidaziz medgorodok” va “Baxti Tashkentskiy” ham qoʻlga olingan edi.
Mavzuga doir: “Qonundagi oʻgʻrilar”: xalq orasida ideallashib ketgan jinoyatchilar
