Oʻzbekiston Yaqin Sharqdagi vaziyat yuzasidan jiddiy xavotir bildirdi
7 oktabr kuni Falastinning Gʻazo sektoridagi HAMAS guruhi "Al-Aqsa boʻroni" operatsiyasi boshlanganini eʼlon qildi.
Oʻzbekiston Isroil va Gʻazo sektori oʻrtasidagi keskin vaziyat yuzasidan munosabat bildirdi.
"Oʻzbekiston Respublikasi Tashqi ishlar vazirligi Falastin-Isroil mojarosi hududida tinch aholi orasida koʻplab qurbonlarga olib kelgan va butun Yaqin Sharqdagi vaziyatni sezilarli darajada murakkablashtirgan holat keskinlashganidan jiddiy xavotir bildiradi.
Biz kurashayotgan tomonlarni qurolli qarama-qarshilikni tez fursatlarda tugatish va inqirozni siyosiy hamda diplomatik vositalar orqali hal qilish uchun barcha choralarni koʻrishga chaqiramiz.
Soʻnggi voqealar munosabati bilan halok boʻlganlarning oila aʼzolariga chuqur hamdardlik bildiramiz va barcha jarohatlanganlarning tezroq sogʻayib ketishini tilaymiz" deyiladi TIV bayonotida.
Eslatib oʻtamiz, 7 oktabr kuni Falastinning Gʻazo sektorida HAMAS guruhi "Al-Aqsa boʻroni" operatsiyasi boshlanganini eʼlon qildi. Oqibatda ikki tomondan yuzlab kishilar halok boʻldi. Isroil tomoni esa armiyani oyoqqa turgʻizib, urush boshlanganini eʼlon qildi.
