Qirgʻizistonda uylarni "kotlovan" bosqichida sotish taqiqlandi
Davlat arxitektura va qurilish nazorati departamentiga ushbu talablarning buzilishini, jumladan, noqonuniy reklama, savdo boshlanishi va mablagʻlarni jalb qilishni aniqlash topshirildi.
Qirgʻizistonda quruvchilarga "nol qurilish sikli" (kotlovan) tugagunga qadar kvartiralarni sotish, ulushli ishtirok shartnomalarini tuzish va loyihalarni reklama qilish taqiqlandi, deb xabar beradi 24.kg.
Maʼlumotlarga koʻra, Qirgʻiziston Qurilish, arxitektura, uy-joy va kommunal xizmatlar vaziri Nurdan Oruntayev tegishli buyruqni imzoladi.
Nol qurilish sikli poydevor qoʻyish va yer osti qurilish ishlarini toʻliq yakunlashni oʻz ichiga olgan qurilish bosqichini anglatadi. Ushbu bosqich tugagunga qadar quruvchilarga quyidagilar taqiqlanadi:
-qurilayotgan loyihalarda turar joy va turar joy boʻlmagan binolarni sotish;
-jismoniy va yuridik shaxslarning qurilish uchun mablagʻlaridan foydalanish bilan bogʻliq ulushli ishtirok shartnomalari, dastlabki shartnomalar va boshqa fuqarolik-huquqiy bitimlar tuzish; qurilish loyihalarini reklama qilish.
Davlat arxitektura va qurilish nazorati departamentiga ushbu talablarning buzilishini, jumladan, noqonuniy reklama, savdo boshlanishi va mablagʻlarni jalb qilishni aniqlash topshirildi.
Mutaxassislar allaqachon qurilish kompaniyalari bilan tushuntirish ishlarini olib bormoqdalar.
Avvalroq Oʻzbekistonda Imarat kompaniyasi taʼsischisi Marat Hamdamov qoʻlga olingandi. U ulushdorlarga vaqtida kvartiralarni taqdim etmaslik ortidan yuzaga kelgan mojaro sabab ushlandi.
