Janubiy Koreya Ukrainaga "qoʻshimcha choralar" bilan tahdid qildi va uzr soʻrashga chaqirdi
Prezident Li Chje Myonning aytishicha, agar Kiyev maxfiylik boʻyicha kelishuvni inkor etishda davom etsa va rasman uzr soʻramasa, Seul qoʻshimcha choralar koʻrishi mumkin.
Janubiy Koreya Prezidenti Li Chje Myon Ukraina Shimoliy Koreyalik ikki harbiy asirning Janubiy Koreyaga topshirilgani haqidagi maʼlumotlarni oshkor qilgani yuzasidan rasmiy uzr soʻrashi kerakligini bildirdi.
Uning taʼkidlashicha, Kiyev avval mahbuslarni topshirish haqidagi maʼlumotni oshkor qilmaslikni soʻragan, biroq keyinchalik bunday kelishuv mavjudligini inkor etgan.
Prezident Li Chje Myon Shimoliy Koreyalik askarlar masalasi Koreya xalqi va davlatning shaʼni bilan bogʻliq ekanligini aytib, bu borada sukut saqlay olmasligini taʼkidladi.
"Agar Ukraina faktlarni inkor etishda davom etsa va rasman uzr soʻrashdan bosh tortsa, Seul qoʻshimcha choralar koʻradi", — deb yozdi prezident X ijtimoiy tarmogʻidagi sahifasida.
23 sentabr kuni Ukraina Prezidenti Vladimir Zelenskiy BMT Bosh Assambleyasi minbaridan turib, mamlakat rasmiylari Shimoliy Koreyadan asirga olingan ikki nafar harbiyni Janubiy Koreyaga topshirganini maʼlum qildi. Seul Kiyevni mahbuslarni topshirish haqidagi kelishuvning maxfiylik shartlarini buzganlikda aybladi.
Ukraina tomoni dastlab bunday kelishuv boʻlganini inkor etdi. Keyinchalik Ukraina Tashqi ishlar vazirligi yuz bergan holatni "diplomatik tushunmovchilik" deb atab, nizoni tez orada hal qilishga umid bildirdi.
Janubiy Koreya prezidentining soʻzlariga koʻra, aynan Ukraina tomoni asirlarni topshirish haqidagi maʼlumotni jamoatchilikka oshkor qilmaslikni soʻragan. Uning qoʻshimcha qilishicha, Seul dastlab "odob doirasidan maksimal darajada chiqmagan holda" oʻz noroziligini bildirgan.
Biroq Li Chje Myonning taʼkidlashicha, keyinchalik Kiyev bunday kelishuv mavjudligini inkor eta boshlagan va bu bilan Janubiy Koreya prezidentini yolgʻonchi sifatida koʻrsatgan.
