Milliy kutubxona ortidagi avtoturargohning ekologik ekspertiza xulosasi yoʻqligi maʼlum boʻldi
Loyihada 1 000 dan ortiq daraxt va buta ekilishi rejalashtirilgani qayd etilgan. Biroq yangi koʻchatlar mavjud koʻp yillik daraxtlar va shakllangan yashil hududlarning ekologik, iqlimiy va rekreatsion ahamiyatini toʻliq oʻrnini bosa olmaydi, deyiladi Ekologiya qoʻmitasi munosabatida.
Alisher Navoiy nomidagi Oʻzbekiston Milliy kutubxonasi ortidagi 1,3 gektar hududda avtoturargoh tashkil etish va hududni obodonlashtirish loyihasi rejalashtirilayotgani haqida maʼlumot berilgandi.
Ekologiya va iqlim oʻzgarishi milliy qoʻmitasi maʼlumotiga koʻra, mazkur loyiha boʻyicha hozircha ekologik ekspertiza xulosasi mavjud emas.
Shu sababli hududda har qanday qurilish va obodonlashtirish ishlari, jumladan daraxt va butalarga, yashil maydonlarga hamda tuproq qoplamiga taʼsir koʻrsatishi mumkin boʻlgan ishlar tegishli ekologik baholashdan oʻtkazilmasdan amalga oshirilishi mumkin emas.
Loyihada 1 000 dan ortiq daraxt va buta ekilishi rejalashtirilgani qayd etilgan. Biroq yangi koʻchatlar mavjud koʻp yillik daraxtlar va shakllangan yashil hududlarning ekologik, iqlimiy va rekreatsion ahamiyatini toʻliq oʻrnini bosa olmaydi, deyiladi munosabatda.
Qoʻmita hududdagi mavjud yashil maydon va daraxtlarni maksimal darajada saqlab qolish, ularni toʻliq xatlovdan oʻtkazish hamda loyiha hujjatlarini belgilangan tartibda ekologik ekspertizadan oʻtkazish zarur, deb hisoblashini bildirgan.
Eslatib oʻtamiz, mazkur loyiha faollarning tanqidlariga ham sabab boʻlgandi.
