Xovos tumanida ham hokim oʻzgardi
Shu kunga qadar tuman rahbari sifatida ishlab kelgan Ulugʻbek Yoʻldoshev turli kamchiliklar sabab egallab turgan lavozimidan ozod etildi.
Xovos tumanida hokim almashdi. Xovos tumanida Xalq deputatlari tuman kengashining navbatdan tashqari sessiyasi oʻtkazildi.
Tahliliy-tanqidiy ruhda oʻtgan sessiya ishida viloyat hokimi Erkinjon Turdimov ishtirok etdi.
Erkinjon Turdimov oʻz nutqida tumanda bir qator muhim yoʻnalishlarda jiddiy qoloqlik va sustkashlik holatlari mavjudligini keskin tanqid qildi.
Kambagʻallikni qisqartirish, aholi bandligini oshirish, investitsion loyihalarni ishlab chiqish va amalda yoʻlga qoʻyish, eksport hajmini koʻpaytirish kabi ustuvor masalalarda tuman birinchi rahbarining tashabbusi, masʼuliyati va talabchanligi yetarli darajada emasligini bildirdi.
Sessiyada tashkiliy masala koʻrildi.
Shu kunga qadar tuman hokimi lavozimida ishlab kelgan Yoʻldoshev Ulugʻbek Xasanovich egallab turgan lavozimidan ozod etildi.
Deputatlar tomonidan Raqobatni rivojlantirish va isteʼmolchilar huquqlarini himoya qilish qoʻmitasi Sirdaryo viloyati hududiy boshqarmasi boshligʻi lavozimida faoliyat olib borgan Yuldashev Qomus Mirovich nomzodi Xovos tumani hokimi lavozimiga tasdiqlandi.
Maʼlumot uchun, Qomus Yuldashev 1983 yilda Sirdaryo viloyatining Shirin shahrida tugʻilgan. 2004 yilda Toshkent toʻqimachilik va yengil sanoat institutini tamomlagan.
Avvalroq Andijon viloyati hokimiga ikki oʻrinbosar va Marhamat tumaniga hokim tayinlangandi.