Mashinalarga ekostikerlarni berish tartibi belgilandi

28 noyabrdagi hukumat qarori bilan “Avtotransport vositalaridan chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan normativlarga mosligi darajasini aniqlash, ularni ekologik toifalarga ajratish hamda ekologik stikerlarni berish tartibi toʻgʻrisida”gi nizom tasdiqlandi.

Nizomga koʻra, transport vositasining ekologik toifasi uning ishlab chiqaruvchi tomonidan tasdiqlangan ekologik sinfiga muvofiq belgilanadi.

Bunda transport vositalari mezonlarga koʻra ekologik toifalarga ajratiladi.

1. Benzin, siqilgan va suyultirilgan gaz yoqilgʻisi bilan harakatlanuvchi:

• “Yevro-2” va undan yuqori ekologik sinfiga kiruvchi transport vositalari – “toza” ekologik toifaga;
• “Yevro-0” va “Yevro-1” ekologik sinfiga kiruvchi transport vositalari – “oʻrta” ekologik toifaga;

2. Dizel yoqilgʻi turi bilan harakatlanuvchi:

• “Yevro-4” va undan yuqori ekologik sinfiga kiruvchi transport vositalari – “toza” ekologik toifaga;
• “Yevro-3” ekologik sinfiga kiruvchi transport vositalari – “oʻrta” ekologik toifaga;
• “Yevro-0”, “Yevro-1” va “Yevro-2” ekologik sinfiga kiruvchi transport vositalari – “zararli” ekologik toifaga;

3. Gibrid avtomobillar, muqobil yoqilgʻi turlarida harakatlanuvchi transport vositalari hamda ishlab chiqarilganiga 3 yildan oshmagan transport vositalari – “toza” ekologik toifaga.

Transport vositalarini roʻyxatga olish va qayta roʻyxatga olish jarayonida ularning toifalariga mos ravishda “yashil”, “sariq” yoki “qizil” rangli ekologik stikerlar Davlat yoʻl harakati xavfsizligi boʻlinmalarida ekologik operatorlar tomonidan beriladi.

Transport egasi ixtiyoriy ravishda ekologik stiker olish uchun Ichki ishlar vazirligi Jamoat xavfsizligi departamenti Yoʻl harakati xavfsizligi xizmatiga uning rasmiy veb-sayti yoki YaIDXP (my.gov.uz) orqali murojaat qiladi.

Ekologik stikerlar muddatsiz davrga beriladi.

Eslatib oʻtish kerak, dastlab ekostikerlarni joriy etish 2024 yil 1 iyunidan boshlanishi kerak edi, biroq keyinroq hukumat bu jarayonni 2025 yil 1 martga koʻchirgandi. Soʻng yana qoldirilib, 2026 yil yanvardan belgilangan.

Birinchi bosqichda (2025 — 2027 yillarda) — Toshkent shahrida, ikkinchi bosqichda (2028 — 2030 yillarda) — Nukus shahri va viloyatlar markazlarida hamda, zaruratga koʻra, alohida ekologik zonalarda (sayyohlik markazi, tabiat qoʻriqxonasi, sogʻlomlashtirish hamda dam olish maskanlari va boshqalar), uchinchi bosqichda (2031 — 2034 yillarda) boshqa barcha hududlarda ishga tushirilishi rejalashtirilgan.