Zoyir Mirzayev byudjetdan 10 mlrd soʻm ajratdi
Mablagʻ "Nurafshon biznes markazi"dagi ijtimoiy soha obʼektlarga olib boruvchi ichki yoʻllar qurilishiga sarflanadi.
Toshkent viloyati hokimi Zoyir Mirzayev pul ajratish boʻyicha farmoyishni eʼlon qildi. Hujjat 2025 yil 14 noyabr kuni chiqarilgan.
U "Nurafshon biznes markazi"dagi ijtimoiy obʼektlarga olib boruvchi ichki yoʻllarni qurishga sarflanadi.
"Viloyat mahalliy byudjetining 2025 yil III-chorak yakuni bilan daromadlar rejasining orttirib bajarilgan qismi hisobidan “Nurafshon biznes markazi” hududida joylashgan “Test sinovlarini oʻtkazishga moʻljallangan namunaviy tipdagi pavilon qurish” obʼektiga olib boruvchi va “Malaka oshirish instituti” obʼektidan “Kiberxavfsizlik instituti”ga olib boruvchi ichki yoʻllarni qurish xarajatlari uchun viloyat hokimligiga 10 000,0 mln. (oʻn milliard) soʻm mablagʻ ajratilsin", deyiladi hujjatda.
Iqtisodiy jinoyatlarga qarshi kurashish departamenti viloyat boshqarmasi huzuridagi davlat moliyaviy nazorati inspeksiyasi ajratilgan mablagʻdan maqsadli foydalanilishi ustidan nazorat oʻrnatadi.
Biroz avval Nurafshonda nuroniylar va maʼrifat binolarini qurishga 4,6 mlrd ajratilishi maʼlum boʻlgandi.
Toshkent viloyatida yana boshqa xarajatlar bilan birga jami 18 mlrd soʻmga yaqin mablagʻ sarflanadi.