Toshkent hokimi issiq suvning yangi narxlarini tasdiqladi

Toshkent shahar hokimi issiqlik taʼminotining yangi narxlarini tasdiqlab bergan. Hokim 22 avgustdagi deputatlarning qarorini maʼqullagan.

Veolia Energy Tashkent MChJ XK tomonidan koʻrsatiladigan markazlashgan issiqlik taʼminoti xizmatlari uchun narxlar quyidagicha:

• bazaviy tarif QQSsiz 711 641 soʻm/Gkal;
• aholi uchun QQSsiz 139 860 soʻm/Gkal;
• byudjet tashkilotlariga QQSsiz 952 797 soʻm/Gkal;
• boshqa ulgurji xizmatlar koʻrsatuvchi tashkilotlarga QQSsiz 342 296 soʻm/Gkal.

Ushbu qaror rasmiy eʼlon qilingan kundan eʼtiboran kuchga kirishi aytilgan. Ammo qonunchilikka koʻra, kommunal toʻlovlar narxi oshadigan boʻlsa, bu haqda 15 kun oldin OAV orqali xabar berilishi kerak.

Qarorga koʻra, har yili Toshkent shahar mahalliy byudjeti parametrlarini shakllantirishda aholiga issiqlik energiyasi va issiq suvga pasaytirilgan tariflarni qoʻllash natijasida yuzaga keladigan zararlarni qoplash va investitsion xarajatlarni qoplash uchun zarur subsidiya mablagʻlari ajratiladi.

Shuningdek, aholiga issiqlik taʼminoti xizmatlari boʻyicha pasaytirilgan tariflar qoʻllanilishi natijasida yuzaga keladigan zararlar va investitsion xarajatlarga asoslantirilgan hisob-kitoblarga muvofiq Toshkent shahar mahalliy byudjeti hisobidan har oyda subsidiyalar ajratish orqali qoplab beriladi.

Ushbu yangi narxlar xalq deputatlari Toshkent shahar kengashi tomonidan 22 avgustda maʼqullangan edi.