Namangan shahriga yangi hokim tayinlangani tasdiqlanmadi
Platina.uz sayti maʼlumotga oydinlik kiritish uchun hokimiyat bilan bogʻlandi.
Bir necha kun avval turli telegram kanallarda Namangan shahriga yangi hokim tayinlangani haqida xabarlar tarqalgandi. Platina.uz sayti maʼlumotga oydinlik kiritish uchun hokimiyat bilan bogʻlandi.
Shahar hokimiyatidagilarning tasdiqlashicha, ayni paytda hokimning birinchi oʻrinbosari Dilmurod Umurzaqov hokim vazifasini vaqtincha bajarib turibdi.
Markaziy bank raisi oʻrinbosari A.Kamolovning shaharga hokim etib tayinlangani haqidagi xabarlar oʻz tasdigʻini topmadi.
Ammo Namangan shahar hokimligi rasmiy saytidagi "Rahbariyat" boʻlimida qamoqqa olingan sobiq hokim Anvar Otaxoʻjayev hokim sifatida koʻrsatilgan.
Eslatib oʻtish kerak, sentabr oyi boshida Namangan shahar hokimi poyabzal ishlab chiqaruvchi MChJ rahbaridan 60 ming AQSh dollari miqdorida pora olayotganda ushlangan edi.