Jizzaxda sudya yordamchisi qoʻlga olindi
U mirzachoʻllik ayolni turmush oʻrtogʻi bilan oʻzaro ajrimini tezlashtirib, er-xotin oʻrtasidagi mol-mulkning bir qismini olishida yordam berish evaziga pora soʻragan.
Jizzaxda sudya yordamchisi 300 AQSh dollari olgan vaqtida ushlandi.
Jizzax viloyati fuqarolik ishlari boʻyicha Doʻstlik tumanlararo sudi sudya yordamchisi xizmat mavqeidan foydalangan holda Mirzachoʻl tumanida yashovchi ayolning ishonchiga kiradi.
Xususan, uni turmush oʻrtogʻi bilan oʻzaro ajrimini tezlashtirib, er-xotin oʻrtasidagi mol-mulkning bir qismini olishida yordam berish evaziga 300 AQSh dollari talab qiladi.
DXX xodimlari tomonidan Bosh prokuratura huzuridagi Departament bilan hamkorlikda oʻtkazilgan tezkor tadbirda, u oʻzining xizmat xonasida soʻralgan pul mablagʻini olgan vaqtida ashyoviy dalillar bilan ushlandi.
Hozirda sudya yordamchisiga nisbatan Jinoyat Kodeksining 168-moddasi 3-qismi “v” bandi va 211-moddasi 1-qismi bilan jinoyat ishi qoʻzgʻatilib, “qamoq” ehtiyot chorasi qoʻllanildi.
Tergov harakatlari olib borilmoqda.
Bir necha kun avval Termizda ham sudya yordamchisi qoʻlga olingandi.
U maʼmuriy huquqbuzarlikka oid ish boʻyicha ayblanuvchiga nisbatan yengillik yaratib berish evaziga pul talab qilgan.