Sudyalar oliy maktabi tugatiladi
Uning negizida yangi akademiya tashkil etiladi. Prezident tegishli farmonni imzoladi.
Sud tizimi uchun kadrlar tayyorlash tizimini tubdan takomillashtirish maqsadida Sudyalar oliy maktabi isloh etilib, uning negizida Odil sudlov akademiyasi tashkil etiladi.
Prezident Shavkat Mirziyoyev sud tizimini takomillashtirish va odil sudlov masalalariga oid taqdimot bilan tanishgan. Taqdimotda akademiya konsepsiyasi taqdimot qilingan.
Qayd etilishicha, davlat rahbari bildirilgan takliflarni maʼqullab, tegishli farmonlarni imzolagan. Jumladan, sud tizimida quyidagi islohotlar kutilyapti.
Koʻzi boylangan adolat Oʻzbekistonda "tugʻilmaganmikin"?
Odil sudlov sohasini raqamlashtirish maqsadida “Raqamli sud” konsepsiyasi ishlab chiqilgan va tez orada amaliyotga tatbiq etiladi.
Fuqarolik va iqtisodiy sudlarda koʻriladigan daʼvolarning katta qismi nizosiz ishlarga toʻgʻri kelmoqda. Shu bois bunday masalalarni maʼmuriy organlar vakolatiga oʻtkazish taklif etilmoqda. Bu fuqarolar va tadbirkorlik subʼektlari muammolarining qisqa muddatda hal etilishini taʼminlaydi.
Shuningdek, maʼmuriy va iqtisodiy sud ishlarini eksterritorial tarzda koʻrish tartibi joriy etiladi. Yaʼni bunday sud ishlarini koʻrib chiqishda propiska yoki hududga bogʻliqlik joyi qolmaydi.
Adolat va ishonchni taʼminlashda sudyalik lavozimining barqarorligi muhim. Shu maqsadda sudyalikka tayinlash muddatlarini qayta koʻrib chiqish koʻzda tutilmoqda.
Bundan tashqari, barcha yoʻnalishdagi sudlar boʻyicha mintaqaviy taftish sudlarini tashkil etish, viloyat va unga tenglashtirilgan sudlardagi taftish instansiyalarini tugatish taklifi bildirilgan. Bunda viloyat va unga tenglashtirilgan sudlarda faqatgina apellyatsiya va kassatsiya instansiyasi boʻlishi, taftish instansiyasi esa 5 ta mintaqaviy sudda tashkil etilishi rejalashtirilmoqda.