Yangi agentlikning vazifalari belgilandi
Toʻqimachilikni 2030 yilga qadar rivojlantirish dasturi ishlab chiqiladi, tayyor mahsulot eksportini 2 barobarga oshirish moʻljallanmoqda.
Prezident oʻtkazgan videoselektor yigʻilishida yengil sanoat boʻyicha agentlikka vazifalar topshirildi.
Yangi agentlikka kengash bilan birgalikda tadbirkorlar bilan muloqot qilib, tannarx, ishlab chiqarish va eksport boʻyicha yechimlar ishlab chiqish, “bojxona hududida qayta ishlash” rejimi orqali tayyor mahsulot eksportini 2 barobarga oshirish, kooperatsiyani kuchaytirib, past quvvatda ishlayotgan korxonalarni sogʻlomlashtirish choralarini koʻrish topshirildi.
Xalqaro konsultantlar bilan birgalikda toʻqimachilikni 2030 yilga qadar rivojlantirish dasturini ishlab chiqish hamda charm, ipak va gilamchilik sanoatini rivojlantirish boʻyicha ham takliflarni kiritish vazifasi qoʻyildi.
"Hokimlar, klasterlar va toʻqimachilik korxonalari rahbarlari bir narsani bilishi kerak. Hozirgi sharoitda byudjetga 1 soʻm qoʻshimcha tushum qilish qancha qiyin boʻlayotganini tushungan tushunadi. Bugun aytilgan qoʻllab-quvvatlash choralarini pulga chaqsa, 7 trillion soʻm boʻladi. Endi shunga yarasha natija ham boʻlishi kerak",
- dedi davlat rahbari.
Yigʻilishda belgilangan vazifalar ijrosi ustidan qatʼiy nazorat oʻrnatish topshirildi.
Yigʻilish davomida toʻqimachilik korxonalarining namunali tajribalari koʻrib chiqildi, tarmoq va hududlar rahbarlarining hisoboti tinglandi.
Eslatib oʻtamiz, prezident selektorida Yengil sanoatni rivojlantirish agentligi tashkil etildi. Unga Investitsiyalar vazirining birinchi oʻribosari Nozimjon Xolmurodov rahbarlik qilishi belgilandi.