"Anorbank" xoʻjayini oʻgʻirlanishiga rasmiy izoh berildi
"Ushbu hodisa shaxsiy, korporativ boʻlmagan xususiyatga ega boʻlib, bankning operatsion faoliyatiga aloqador emas", deyiladi bank axborotida.
"Anorbank"ning asosiy aksiyadori Parijda oʻgʻirlanib, evaziga tovon puli talab qilingan holati boʻyicha bank rasmiy izoh berdi.
"Ushbu hodisa shaxsiy, korporativ boʻlmagan xususiyatga ega boʻlib, bankning operatsion faoliyatiga aloqador emas. ANORBANK oʻz ishini odatdagi tartibda davom ettirmoqda – barcha boʻlimlar, xizmatlar va raqamli kanallar barqaror ishlayapti, joriy va strategik loyihalar tasdiqlangan rejalarga muvofiq amalga oshirilmoqda", deyiladi axborotda.
"Anorbank" ommaviy axborot vositalari vakillaridan ushbu mavzuni yoritishda axloqiy meʼyorlarga rioya qilishni, tekshirilmagan maʼlumotlarni eʼlon qilmaslikni va shaxsiy hayot daxlsizligini hurmat qilishni soʻragan. Bank, shuningdek, ortiqcha muhokamalar yoki tekshirilmagan maʼlumotlarni tarqatish rasmiy tergov jarayoniga ham, jabrlanuvchining shaxsiy hayoti daxlsizligiga hurmat koʻrsatishga ham salbiy taʼsir koʻrsatishi mumkinligiga eʼtibor qaratgan.