Komil Allamjonov yana siyosatga qaytdi
U Prezident administratsiyasida yangi lavozimda ish boshlaydi.
Komil Allamjonov Prezident administratsiyasi rahbarining jamoatchilik asosida mustaqil maslahatchisi lavozimiga tayinlandi. Bu lavozim yangi tashkil qilindi.
Allamjonov ushbu lavozimda innovatsion iqtisodiyotni rivojlantirish, investitsiyalarni jalb etish, soʻz erkinligini taʼminlash va mustaqil ommaviy axborot vositalarini qoʻllab-quvvatlash sohalarida ekspertlik yordamini koʻrsatishi aytilgan.
Allamjonov 2024 yil sentabrda ikki yillik faoliyatidan keyin Administratsiyadan ishdan ketgandi. U ishdan ketish sababini ochiqlab, siyosatdan butkul yiroq yurib, biznes bilan shugʻullanishini aytgandi.
Avvalroq Prezident administratsiyasi rahbari lavozimi qayta tiklanib, unga Saida Mirziyoyeva rahbar etib tayinlangan edi.
2024 yil oktabr oyida Komil Allamjonovga suiqasd uyushtirilgandi. Ushbu jinoyat ishiga aloqador deb Rossiya fuqarolari Bislan Rasayev va Shamil Temirxanov ekani ochiqlangandi.