Qashqadaryodagi "zapravka"da portlash boʻldi

10 mart kuni Qashqadaryo viloyati Kasbi tumani Doʻstlik mahallasi hududida joylashgan yoqilgʻi quyish shoxobchasi hovlisida 2 ta 9 tonnali sigʻim yongan.

Favqulodda vaziyatlar vazirligi xabariga koʻra, voqea joyiga borgan 4 ta yongʻin qutqaruv boʻlinmasi yarim soatda yongʻinni toʻliq oʻchirgan.

Yongʻin oqibatida 2 nafar fuqaro kuyish tan jarohatini olgan. Hozirda ularning ahvoli yaxshiligi aytilgan.

Yongʻin sababi va zarariga aniqlik kiritilmoqda.

Eslatib oʻtamiz, dekabr oyida Fargʻonadagi "zapravka"da ham portlash yuz bergan, rasmiy maʼlumot boʻyicha 4 kishi halok boʻlgan edi.