Xurshid Qoraboyev Toshkent viloyati hokimi oʻrinbosari etib tayinlandi
U avval Vazirlar Mahkamasi, Qishloq xoʻjaligi vazirligi, Savdo-sanoat palatasi va boshqa tashkilotlarda ishlagan.
Toshkent viloyati hokimining qarori bilan Qoraboyev Xurshid Abduvahobovich viloyat hokimining qishloq va suv xoʻjaligi masalalari boʻyicha oʻrinbosari lavozimiga tayinlandi.
Xurshid Qoraboyev 1987 yil Parkent tumanida tugʻilgan. Toshkent davlat iqtisodiyot universitetini tamomlagan.
Mehnat faoliyatini Toshkent viloyati iqtisodiyot bosh boshqarmasida birinchi toifali mutaxassis vazifasida boshlagan. 2011-2016 yillarda u mazkur tashkilotda yetakchi mutaxassis, bosh mutaxassis, boʻlim mudiri oʻrinbosari, boʻlim boshligʻi, boshqarma boshligʻining oʻrinbosari lavozimlarida ishlagan.
Shuningdek, u Vazirlar Mahkamasi, Qishloq xoʻjaligi vazirligida, "Oʻzbekoziqovqatxolding" kompaniyasi, Toshkent viloyati investitsiyalar va tashqi savdo boshqarmasida masʼul lavozimlarda faoliyat yuritgan.
Xurshid Qoraboyev mazkur lavozimga tayinlangunga qadar Oʻzbekiston savdo-sanoat palatasi Qishloq xoʻjaligi sohasida tadbirkorlikka koʻmaklashish boshqarmasi boshligʻi lavozimida ishlab kelayotgan edi.
Eslatib oʻtamiz, oktabr oyida hokimning qishloq xoʻjaligi boʻyicha oʻrinbosari Botir Alimbekov prezident yigʻilishida ishdan olingandi.