Navoiyda ham isitish mavsumi 7 noyabrdan boshlanadi
Bu haqda hokim Normat Tursunovning farmoyishi eʼlon qilindi.
Navoiy viloyatida iqtisodiyot tarmoqlari, uy-joy fondi va ijtimoiy soha obʼektlarini isitish mavsumi 2024 yil 7 noyabrdan boshlanadi. Bu haqda hokim Normat Tursunovning farmoyishi eʼlon qilindi.
Viloyat qurilish va uy-joy kommunal xoʻjaligi bosh boshqarmasi "Issiqlik manbai" DUK bilan birgalikda kommunal xizmatlar koʻrsatilayotgan hududlardagi koʻp qavatli uylar, ijtimoiy soha va boshqa obʼektlarga qish mavsumida uzluksiz hamda bir meʼyorda issiqlik energiyasi yetkazib berilishini taʼminlaydi.
Mazkur farmoyishning bajarilishini nazorat qilish viloyat hokimining oʻrinbosari E.Kamolov hamda viloyat qurilish va uy-joy kommunal xoʻjaligi bosh boshqarmasi boshligʻi A.Niyozov zimmalariga yuklangan.
Eslatib oʻtamiz, 7 noyabrdan Toshkentda ham isitish mavsumi boshlanishi xabar berilgandi. Oʻzbekiston boʻylab ilk bor 1 noyabrdan Surxondaryoda isitishga start berilgandi.