Toshkent viloyati hokimiga oʻrinbosar tayinlandi
Otabek Tursunov viloyat hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari lavozimini egalladi.
Toshkent viloyati hokimiga birinchi oʻrinbosar tayinlandi.
Tursunov Otabek Ravshanbek oʻgʻli Toshkent viloyati hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari – viloyat iqtisodiyot va moliya bosh boshqarmasi boshligʻi
Otabek Tursunov 1984 yilda Andijon viloyati Andijon shahrida tugʻilgan. Maʼlumoti – oliy. 2007 yilda Andijon muhandislik-iqtisodiyot institutini tamomlagan.
Otabek Tursunov mehnat faoliyatini 2004 yilda Andijon shahar «Sanoat qurilish temp» masʼuliyati cheklangan jamiyati taʼminotchisi vazifasidan boshlagan. Faoliyati davomida Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi Hududlarni kompleks rivojlantirish departamenti direktori oʻrinbosari, Oʻzbekiston Respublikasi Bosh vaziri oʻrinbosari D. A. Qoʻchqorovning kotibiyatining bosh mutaxassisi vazifasini vaqtincha bajaruvchi kabi masʼuliyatli lavozimlarda ishlagan.
Tayinlovga qadar Oʻzbekiston Respublikasi Vazirlar Mahkamasi Iqtisodiyot, sanoat, moliya-bank, soliq, davlat aktivlari, tadbirkorlikni qoʻllab-quvvatlash va kambagʻallikni qisqartirish masalalari kotibiyati mudirining oʻrinbosari lavozimida faoliyat yuritayotgan edi.
Eslatib oʻtamiz, bir necha kun avval prezident yigʻilishida Toshkent viloyati hokimining ikki birinchi oʻrinbosari ishdan olingandi.
