Fransiya Pavel Durovning akasini qamoqqa olishga order berdi
Politico nashri maʼlumotiga koʻra, aka-ukani qamash boʻyicha qaror bir necha oy avval chiqarilgan.
Fransiya Telegram asoschisi Pavel Durovning akasi Nikolayni qamoqqa olish uchun order berdi.
Bu haqda Politico hukumat hujjatiga asoslanib maʼlum qilgan. Nikolay Durov ukasi Pavel bilan birgalikda 2024 yil mart oyida qidiruvga berilgan.
"Hujjat shuni koʻrsatadiki, Telegramga nisbatan fransuz tergovi bir necha oy oldin boshlangan va bu ish Telegramning bolalarga jinsiy zoʻravonlik boʻyicha tergov doirasida fransuz politsiyasi bilan hamkorlik qilishdan bosh tortishi bilan bogʻliq", — deb yozadi Politico.
Nashrning yozishicha, Pavel va Nikolay Durovlarni hibsga olish uchun orderlar Telegramning ismi oshkor etilmagan foydalanuvchisining shaxsini aniqlash boʻyicha sud soʻrovini javobsiz qoldirganidan keyin chiqarilgan.
Eslatib oʻtamiz, Pavel Durov 24 avgust kuni Parijda ushlandi. Unga 12 ta ayblov qoʻyilgan.
